Draumasetrið Skuggsjá


27.07.2020 Hin sælu sólskinslönd sumardrauma...
	Sumarið er tíminn þegar hjartað verður grænt og augu þín verða himinblá ójá, syngur Bubbi. Og um að gera að njóta þessa stutta sumars hér á Fróni og safna góðum minningum í sarpinn fyrir kaldari mánuðina. Trúlega er fyrsta skrefið bara að anda og vera til. En nú sýna æ fleiri rannsóknir mikilvægi slakrar og djúprar öndunar fyrir bæði andlega og líkamlega heilsu og aukin lífsgæði eins og Harvard Health hefur fjallað um varðandi tengsl öndunar og heilsu í greinum sínum. Og vitnað til merkra rannsókna á einföldum öndunaræfingum og tengsla þeirra við betri líðan og bætt heilsugæði í daglegu lífi. Slíkar öndunaræfingar eru nú kenndar víða um lönd, s.s. af Sudarshan Kriya Yoga, sem hefur aðalaðsetur í Bangalore á Indlandi og er með útibú hér og þar um heiminn. Gjarnan skammstafað SKY. (Sjá til að mynda www.artofliving.org). Kriya Yoga er mörgum Íslendingum, bæði fyrr og nú, vel kunnugt í gegnum bók Yogananda, Sjálfsævisaga Yoga, eða Hvað er bak við myrkur lokaðra augna, eins og sú vinsæla bók hét í fyrstu útgáfunni, þýdd af Ingibjörgu Th. Sörenson, og út kom hjá Leiftri árið 1958 en upphaflega í BNA 1946. Þar sem Kriya Yoga byggir á lífeðlisfræði og aldagömlum vísindum, og iðkendur þurfa ekki að aðhyllast ákveðna trú frekar en þeir kjósa, hefur þessi snjalla en einfalda iðkun eflaust náð að heilla marga, trúaða sem trúlausa. Það að hægja á okkur í daglegu lífi og gefa okkur tíma til að huga að önduninni og slaka á, fylgja hljómfalli líkama og sálar, hefur líka áhrif á gæði hvíldar og svefns, bæði djúpsvefns og draumsvefns. Rannsóknir sýna, að bæði þessi svefnstig lengjast í betri öndun. Margir hafa einmitt bent á, að í covid hafi þá aftur farið að dreyma meira og betur og séu í nánari tengslum við sjálfa sig. Eitt af því sem covid hefur vakið okkur til umhugsunar um, er að bera ábyrgð á okkur sjálfum og forgangsraða. Hver andardráttur er dýrmætur en með grunnri öndun í gegnum munn, sem okkur er svo títt í amstri dagsins, erum við ekki að ná dýpri tengingu eða betri fókus heldur þvert á mótí, streita eykst og við göngum á orkubirgðir okkar og ónæmiskerfi og úr verður ákveðið jafnvægisleysi. Nú sýna nýjar rannsóknir, að lungun eru sérstaklega útsett fyrir kórónuveirunni en einfaldar, daglegar öndunaræfingar sem kosta ekkert, geta styrkt enn betur lungu og öndunarfærakerfi, og flökkutaugina svonefndu, (vagus nerve). En sú taug á kjarna sinn í mænukylfu og liggur frá botni heila niður í maga í gegnum háls--kvíslast þaðan út í bringu og niður í maga--, og er um 60 cm löng í fullorðnum einstaklingi. Mikilvægi hennar í heilsufari okkar, er að koma æ betur í ljós. Þrengsli í koki, ör hjartsláttur, vöðvastífleiki og þrenging í brjótskassa, sýna okkur m.a. að flökkutaugin og þar með tenging líkama við heila, er ekki í nógu góðu lagi. Að anda djúpt, þýðir ma.a. að anda alla leið ofan í maga, og styrkja með því móti starfsemi þessarar mikilvægu taugar fyrir líkamlega sem andlega vellíðan. Já, munum að anda að okkur íslenska sumrinu og vera til í hinum sælu sólskinslöndum sumardraumanna--- þar sem yndi, vor og von, vagga hverju blómi, eins og skáldið frá Hlíðarendakoti í hinni fögru Fljótshlíð, kvað svo fallega, Þorsteinn Erlingsson, (1858-1914). #
	Meira >>


20.06.2020 Draumabláar Sumarsólstöður og Stjörnu-Oddi
	Sumarsólstöður eru í dag 20. júní og svokölluð sólstöðumínúta kl. 21.44 í kvöld. Dagur er nú lengstur og sól efst á himinbaugi. Tíminn stendur í stað eina örskotsstund í kvöld. Síðan fer sól að hverfast til nýs tíma og dagur að styttast. Vanalega ber sólstöður á sumri upp á 21. júní en vegna hlaupárs í ár, eru þær í dag. Óbreyttur vinnumaður að Múla í Aðaldal á 12. öld, reiknaði út sólstöður á sumri og vetri og hlaupár og margt fleira og færði löndum sínum þau merku fræði. Magnað! Margt tökum við nútímamenn sem sjálfsögðum hlutum sem forfeðurnir þurftu að leggja á sig ómælt erfiði fyrir. En hræringar dagsins í náttúrunni og yfirstandandi farsótt um heim allan, minnir okkur óþyrmilega á að tími er til að vakna og horfast í augu við veruleikann. Verulega snarpir jarðskjálftar urðu upp úr kl. 15 á Tjörnesbrotabeltinu úti fyrir Eyjafirði og Siglufirði við Gjögurtá og fundust víða. Í draumi nætur, sást hafblár, glæsilegur og hraðskreiður fólksbíll bruna niður götuna og fór ekki að neinum umferðar- reglum, slíkur var hraðinn, en sást þó vel í afturhutann, klesstan stuðara og klesst aftara horn, sem sneri að húsinu, rétt áður en hann hvarf sjónum og hélt ótrauður áfram för sinni þó laskaður væri. Er óskandi að það gangi eftir og að hamfarir verði ekki frekari og verri né tjón á mönnum og málleysingjum og eignum. Ljóst að Náttúran fer ekki að manngerðum lögum og reglum heldur eigin lögmálum. Já, margt býr í draumum... Um það vitna fornar sagnir og nýjar en í dag á Sumarsólstöðum er minning Stjörnu-Odda heiðruð austur í Aðaldal með minnisvarða við Grenjaðarstað og neðan Múla og málþingi í Ýdölum. En Stjörnu-Oddatala sem við hann er kennd, segir frá merkum draumi eða draumleiðslu Odda Helgasonar, vinnumanns á Múla í Aðaldal á 12. öld. Lýsir athugunum hans á gangi himintungla, útreikningum fyrir sólstöður og hlaupár, ofl. í 3 köflum. Talan var líka glöggur vegvísir sæfaranda að rata og sigla eftir á miðöldum. Tekið skal fram að fátt er vitað um hinn raunverulega og stjarnvísa Odda nema frásögn hans, eða tala, hefur varðveist á 2 blaðsíðum í Íslendinga- þáttum frá 13. öld, og 2 kaflar af þrem, birtast í Hauksbók frá 14. öld, í Rímbegluhluta hennar. En rím er þar notað í merkingunni tími. Stjörnu-Oddi þótti afburða rímspakur... Vel er við hæfi að bæði heiðra og halda á lofti minningu Odda, eins merkasta vísindamanns Íslendinga og tímatalssérfræðings okkar á miðöldum og til dagsins í dag. Ýmislegt bendir til að Oddi hafi haft aðgang að ritum um stjarnvísindi og stærðfræði, s.s. hins persneska Muhammad al-Khwarizmi--Algorithmi, (ca. 780-850), fremsta stærðfræðings miðalda og höfund bæði algóritmans--algrímsins og algebrunnar. Og af mörgum nú talinn forgöngumaður nútíma tölvunarfræða. Að ótöldu því að Íslendingar fóru trúlega víðar á þessum tíma um Evrópulönd, Miðausturlönd og einhverjir etv. um Silkiveginn lengra austur en við gerum okkur almennt grein fyrir. Og komust með ferðum sínum í kynni við ýmsa heimspeki, siði og menningu, nýjar vísindahugmyndir og uppgötvanir. Kannski fór Oddi slíkar ferðir og/eða hlaut vitneskju sína í ferðum draumheima! Stjörnu-Oddatala í Íslendingaþáttum og í Hauksbók, segir frá draumi eða draumleiðslu Odda sem var eitt sinn staddur úti í Flatey á Skjálfanda að vitja fiskjar. Oddi vaknar um miðjan draum og gengur út og horfir til himins og stjarna. Leitar svara við tíð og tíma og segir fram athuganir sínar. Frásögn hans--tala--finnst skráð í tímatali Hauksbókar sem Haukur Erlendsson, lögmaður, ásamt fleirum, er talinn hafa skráð á 14. öld, þá úr eldri handritum. En í Hauksbók segir líka frá kenningu Algorismus; líklega hafa skrif varðveist á latínu, þýdd á fornmál vort; upprunaleg skrif á arabísku hafa enn ekki fundist. Vitað er að Haukur var búsettur í Gaulverjabæ í Flóa í byrjun 14. aldar, og er Hauksbók byggð upp af handritum nokkurra fornsagna svo og Völuspár, Rímbeglu ofl. rita. Og eru 2 kaflar Oddatölu skráðir með rithönd Hauks sjálfs. Það merkilega er að nokkur hundruð árum síðar, eða í byrjun 18. aldar, finnur Árni Magnússon, handritasafnari, skinnhandrit Hauksbókar í Gaulverjabæ eftir að sum handrit hennar höfðu farið víða um land, að talið er. En ratað heim! Tilveran er greinilega ekki bara línuleg heldur hafa algrím almyndar/heilmyndar, (hologram), mmeð tíma okkar og tilveru að gera. Líkt og draumar minna okkur á en í þeim ríkir visst tímaleysi. Svo er það hinn óræði Draumtími--Dreamtime. Tíminn handan tímans... #
	Meira >>


18.05.2020 Að vera í takti í skógi drauma með söng í hjarta
	Bjartir og glaðir dagar lyfta nú sál og sinni uppúr Covid þunganum og vetrar- illviðrunum sem svo sannarlega hafa sett mark sitt á skóginn; skóginn sem griðastað drauma hvar fulgar syngja vorinu ljóð og við erum í takti við lífið. Kjarnaskógur er gott dæmi. Fuglar kvaka og vappa, skógarþrestir, hrossagaukar, lóur, tjaldar, allir í bland. Tryggir heimkynnunum í Norðrinu og sumir flogið þúsundir kílómetra yfir höfin. En skógurinn kemur hrakinn undan vetri; áratugum saman hefur ekki orðið slík eyðilegging þar sem nú, eins og sjá má ef stígurinn upp með Brunnánni er genginn. Hamfarir og snjóþungi hafa brotið niður bæði stór og lítil tré liggjandi eins og hráviði í slóðinni og út um allt. Hér mætti sannarlega skapa störf hjálpfúsra handa við tiltekt og hreinsun... Og því skyldi heldur ekki gleyma að margir eru hraktir eftir veðurhamfarir liðins vetrar og óvægna farsótt með öllu tilheyrandi. Bjargir og samhugur þurfa að koma til og þó fyrr hefði verið því ýmsir hópar í samfélaginu hafa því miður lengi verið skildir eftir og þola fyrir vikið ekki enn frekari þrengingar. Hugrinn leitar í annan skóg, nú í skosku hálöndunum, til heimkynna Skuggsjár þar, í Balquhidder hvar presturinn Robert Kirk þjónaði í áratugi á 17. öld og safnaði frásögnum af verum annarra heima. Einn helsti faðir skoskra þjóðfræða. Og hvar enska skáldið, William Wordsworth, (1770-1850), orti hugfanginn af skógardýrð og kynngi skógardalsins fagra-- Balquhidder--, um mikilvægi þess að eignast söng í hjarta. Snortinn af ímynduðum tregasöng Hálandastúlkunnar sem yrkir jörðina og nefnir The Solitary Reaper. Söng sem hreyfir við fjarlægum löndum og höfum og fyllir hjörtun... Um þær mundir var Iðnbyltingin að setja mark sitt á líf fólks og hversdagsins og umbylta öllu, svo mjög að Wordswoth fylltist sorg yfir mögulega glötuðum tengslum við Náttúruna og visku hennar, og þess að falla sjálf úr takti eins og segir í ljóðinu The World is too much with us: The World is too much with us; late and soon; Getting and spending, we lay waste our powers;- Little we see in Nature that is ours; we have given our hearts away, a sordid boon! This Sea that bares her bosom to the moon; The Winds that will be howling at all hours; And are up-gathered now like sleeping flowers; For this, for everything, we are out of tune;- It moves us not. ------------- Margir tala um aukið draumflæði í því hléi sem orðið hefur á öllu vegna covid sem sýnir hve svefn og hvíld og að vera í kyrrð með sjálfum sér, eykur aðgengi okkar að dýpri sviðum vitundarinnar. Draumarnir eru líka gjarnan áberandi skírir, bæði táknrænir og augljósir. Og það merkilega er að draumar af sjálfri kórónunni, birta ekki beina mynd af veirunni heldur koma fremur fram sem draumar af ormum og pöddum sem fólki finnst herja á sig líkt og í kófi fyrir vitum þess og andliti svo vitnað sé í nokkra svipaða slíka drauma sem borist hafa. Talið er að tákn yfir svo nýja reynslu sem veiran er, birtist okkur enn í draumi sem dýr sem við þekkjum betur til, og að það taki langan tíma fyrir undirvitundina eða hina sammannlegu dulvitund að hætti Jung, að tileinka sér og mynda nýjar myndir og tákn af nýjum, áður óþekktum fyrirbærum. Er Náttúran etv. að endurstilla sig og þar með heim manna? Vonum það besta með söng í hjarta - og verum í takti! #
	Meira >>


12.04.2020 Páskar og tími upprisu: tímavíddir eyfirsks afdalabónda
	Páskar enn á ný við ysta haf. Tími upprisu og endurnýjunar í Náttúru og mannheimi. Tíminn í raunheimum er öðruvísi en í draumum en samt er tími daganna nú, líkari draumi, raunar líkari martröð en nokkru öðru eða nokkru sinni fyrr hjá nútímamönnum. Að hugsa ekki bara í tímalínum heldur í hringrás, gæti reynst hjálplegt á þessum óvissutímum. Eyfirskur afdalabóndi á síðustu öld, Kjartan Júlíusson á Skáldstöðum efri, var þekktur af sínu heimilisfólki fyrir áhuga sinn á tímavíddum drauma en einnig af landkönnun sinni á fjöllum; einkum fór hann þessar fjallaferðir að kvöld- og næturlagi þegar skilin dags og nætur runnu saman. Kjartan skráði daglega drauma sína, m.a. á pappírshólkana af Tímanum sem þá var víða keyptur til sjávar og sveita og barst með ötulum póstinum/mjólkurbílnum frameftir. Góð vinkona Skuggsjár, alin upp hjá Kjartani og konu hans í gamla torfbænum á Skáldstöðum til 10 ára aldurs, kann ýmsar sögur af Kjartani og Halldóri Laxness, sem var mikill vinur hans og tíður heimilisgestur. Spurning með Bjart í Sumarhúsum... og makalaus táknfræði bæjarnafnsins, Skáldstaðir, í því samhengi! Kjartani varð tíðrætt um hreina og tæra loftið á fjöllum og hve létt væri að ganga þar í efstu hæðum. Hann lýsir fjallakönnun sinni í bókinni Reginfjöll að haustnóttum sem Iðunn gaf út 1978 með formála nóbelskáldsins. En þar talar Laxness m.a. um fjallamálverk sem þá voru komin í tísku á veggjum landsmanna og hve þau færa landann nær náttúrunni og kynngi hennar. Enduruppgötvun náttúrunnar á stofuvegg, hvetur til fjallakönnunar í raunheimi! Sannkallað barn náttúrunnar, Kjartan, sem tók mark á draumum sínum til leiðsagnar og virti gjafir þeirra. Um leið og hann kannaði hin þunnu skil heimanna og möguleikana á að sækja þangað ljós og visku, þá virðist hann hafa sótt í spilverk minninga úr fortíð en líka áfram úr framtíð líkt og frumbyggjar víða um heim. En Öldungar þeirra kveða sér nú hljóðs og má þar nefna Öldunga Hopi indíána og frumbyggja Ástralíu. Skilaboð þeirra tengjast skilum heima og vídda: við erum að ganga í gegnum óhjákvæmilega gátt breytinga, (port--portal), og inn í nýja tíma og nýja vídd. Verum vonbjört þessa páska og gleðjumst yfir lífinu þrátt fyrir viðsjár. Gerumst læs á þær rúnir sem náttúran ristir. #
	Meira >>

Síðasta frétt 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 Næsta frétt

© 2007 Draumasetrið Skuggsjá Hönnun Design EuropA